Kryetari i Prizrenit, Shaqir Totaj ka njoftuar se zjarri në bjeshkët e Prevallës është shuar dhe nuk duket se ka shenja se mund të përsëritet gjendja e njëjtë.

Me anë të një postimi në Facebook, Totaj theksoi se shuarja e zjarrit u mundësua pas intervenimit nga ajri, nga ana e KFOR-it, shkruan Arbresh.info.

“Si rezultat i përcjelljes së gjendjes së krijuar me zjarret në Prevallë dhe pas konsultimeve me të gjithë akteret, përfshirë edhe KFOR-in, u vlerësua se për ta evituar rrezikun e përhapjes së mëtutjeshme të zjarrit duhet intervenuar nga ajri. KFOR-i edhe një herë e ri konfirmoi përkushtimin për t’u gjetur aty kur rrezikohet prona dhe jeta e banorëve në Kosovë.”, tha ai.

“Gjate intervenimit nga ajri, nga ana e KFOR-it, me anë të helikopterëve është hedhur ujë, ndërsa, zjarri është shuar dhe nuk duket se ka shenja se mund të përsëritet gjendja e njejtë. Megjithatë, bashkë me të gjithë akterët relevant në terren jemi në përcjellje të situatës.”, shkroi Totaj.

Ai shprehu falënderimin dhe mirënjohjen ndaj ndaj KFOR-it por dhe ndaj të gjithë akterëve tjerë të cilët dhanë kontributin për menaxhimin e pastaj për të shuar zjarrin.

“Falënderim për shtabin emergjent të krijuar nga Drejtoria e Emergjencës dhe Sigurisë e Komunës së Prizrenit, posaçërisht zjarrfikësve prizrenas që monitoruan situatën gjatë gjithë kohës.”, përfundoi Totaj./Arbresh.info/